夢伴

曾幾何時，社會相對簡單，生活無咁多娛樂，觀天係可以用來打發時間。滿天星宿加上一點創造力，形成不同的星座和神話故事，什麼宙斯諸神，嫦娥奔月，流傅千年流傳至今，無不帶領人類思考更多。 

人類天生就不懂飛翔，卻有著無窮嘅好奇心同想像力。 當好奇心加上一點點幻想就會變成不同的夢，飛天是其中之一。

上世紀初，飛行器具成功誕生，為人類離地跨出一大步，其後不到一百年，飄飄然嘅感覺牽引著人類創造更多有關飛行載具同相關儀器，手錶亦係其中之一。
六七十年代嘅太空競賽可謂充滿傳奇色彩，當中美國嘅太陽神十三號事件令Omega Speedmaster 名留青史。當時太空艙發生意外，電力系統故障，計時儀器失靈，太空人計算返回地球嘅時間唯有交比手上嘅機械計時手錶, 當然最後順利返回地球，Speedmaster應記上一功。太陽神十三號嘅故事拍過電影，故事性十足。

但要知道，由太空返回地球唔係講笑，應該話係驚險過拍戲。2003年穿梭機哥倫比亞號返回地球時爆炸，全機完全瓦解，每位太空人嘅手錶都伴隨著佢地葬身意外之中，歷歷在目。諗返起，心情依然一酸。

一隻機械手錶伴隨人類飛天逐夢，完成一個又一個的挑戰，彷彿像有生命似的，默默在守護著挑戰者。手錶當然是死物，但故事和經歷卻令佢活起來。唔經唔覺Speedmaster 系列已經踏入六十個年頭，人們依然熱捧，信賴佢可以陪伴著每一個人逐夢，面對人生的不同挑戰。